ກອງ​ປະຊຸມ​ຄະນະ​ຊີ້ນຳ​ໂຄງການ​ຂັ້ນສູນ​ກາງ 8

 

ກອງປະຊຸມຄະນະຊີ້ນຳໂຄງການຂັ້ນສູນກາງຂອງໂຄງການພັດທະນາລະບົບນິເວດຊີວະນາໆພັນກະສິກຳຢູ່ເຂດພູດອຍ

 

          ​ໃນ​ຕອນ​ເຊົ້າຂອງ​ວັນ​ທີ21 ພະຈິກ2016 ນີ້ຢູ່​ທີ່ຫ້ອງ​ປະຊຸມ​ພະ​ແນ​ກ​ແຜນການ​ແລະການ​ລົງທຶນ​ແຂວງ​ຊຽງຂວາງ​ໄດ້​ຈັດ​ກອງ​ປະຊຸມ​ຄະນະ​ຊີ້ນຳ​ໂຄງການ​ຂັ້ນສູນ​ກາງຄັ້ງທີ8 ຂອງໂຄງການ​ພັດທະນາ​ລະບົບ​ນິ​ເວດ​ຊີວະ​ນາໆພັນ​ກະສິກຳ​ຢູ່​ເຂດ​ພູດ​ອຍ,ຈຸດປະສົງ​ໃນ​ການຈັດ​ກອງ​ປະຊຸມ​ກໍ່ແມ່ນ​ແນ່​ໃສ່​ເພື່ອ​ຟື້ນຟູ​ຊີວະ​ນາໆພັນ​ກະສິກຳ​ໃຫ້​ກາຍ​ເປັນ​ທ່າ​ແຮງ​ພື້ນອັນ​ສຳຄັນ​ຕໍ່​ການ​ຍົກ​ລະດັບ​ຊີວິດ​ກນ​ເປັນ​ຢູ່​ຂອງ​ປະຊາຊົນ​ບັນດາ​ເຜົ່າ​ແລະປະກອບສ່ວນ​ເຂົ້າ​ໃນ​ການລົບ​ລ້າງ​ຄວາມທຸກ​ຍາກ. ກອງ​ປະຊຸມ​ຄັ້ງນີ້​ໂດຍການ​ເປັນ​ປະທານ​ແລະກ່າວ​ເປີດ​ກອງ​ປະຊຸມ​ຂອງທ່ານ ປອພວງ​ປາຣິສັກປຮະ​ວົງວຽງຄຳຮອງ​ລັດຖະມົນຕີ​ກະຊວງ​ກະສິກຳ​ແລະປ່າ​ໄມ້,​ເປັນກຽດ​ເຂົ້າຮ່ວມ​ມີທ່ານປອ ຄຳ​ປາວມົວຮອງ​ເຈົ້າ​ແຂວງໆຊຽງຂວາງ,ມີທ່ານມາ​ຕິນຮັດ​ເລີຮອງ​ອົງການ​ຮ່ວມ​ມື​ເພື່ອ​ການພັດທະນາ​ຂອງ​ປະ​ເທດ​ສະ​ວິດ​ເຊີ​ແລນປະຈຳສປປລາວ, ມີ​ບັນດາ​ກົມ​ທີ່​ກ່ຽວຂ້ອງ​ຂອງ​ກະຊວງ​ກະສິກຳ​ແລະປ່າ​ໄມ້,ພ້ອມ​ກັບ​ພາກສ່ວນ​ທີ່​ກ່ຽວຂ້ອງ​ທັງ3 ​ແຂວງ​ຄື: ​ແຂວງ​ຊຽງຂວາງ,​ແຂວງ​ຫົວພັນ​ແລະ​ແຂວງ​ຫລວງ​ພະ​ບາງ​ເຂົ້າຮ່ວມ. ​ໃນ​ກອງ​ປະຊຸມ​ໄດ້​ຮັບ​ຟັງ​ການວາງ​ແຜນ,ຈັດ​ສັນ​ການຄຸ້ມ​ຄອງນຳ​ໃຊ້​ທີ່​ດິນ​ກະສິກຳ​ແລະປ່າ​ໄມ້​ແບບ​ມີ​ສ່ວນ​ຮ່ວມ​ແລະຮັບປະກັນ,ພ້ອມ​ກັບການພັດທະນາ​ຊົນນະບົດ​ແລະຊີ​ວິການ​ເປັນ​ຢູ່​ຂອງ​ປະຊາຊົນ​ໂດຍ​ອີງ​ໃສ່​ຊີວະ​ນາໆພັນ​ກະສິກຳ​ເປັນ​ທ່າ​ແຮງ​ຕົ້ນຕໍ​ເຊັ່ນ:ການ​ລ້ຽງ​ເຜິ້ງຫລື(​ແມງ​ດັ້ນ) ​ແລະການ​ຜະລິດ​ຈຳໜ່າຍນ້ຳ​ເຜິ້ງ​,ການລ້ຽງສັດ​ພື້ນ​ເມືອງ​ເປັນຕົ້ນ​ແມ່ນໝູລາດ​ແລະ​ໄກ່​ພື້ນ​ເມືອງ,ປັບປຸງ​ພັນ​ເຂົ້າບໍລິສຸດພັດທະນາ​ຕ່ອງ​ໂສ້​ຜະລິດ​ແນວ​ພັນ,ປັບປຸງ​ພັດທະນາ​ຄຸນ​ນະພາ​ບດິນ​ຄຸ້ມ​ຄອງ​ນຳ​ໃຊ້,​ຟື້ນຟູ​ຂະຫຍາ​ຍພັນ​ໄມ້​ໃຫ້ໝາກ​ແລະພືດ​ອຸດສາຫະກຳ(ພັນ​ພື້ນ​ເມືອງ),​ໂຄສະນາ​ໃຫ້​ຄວາມ​ຮູ້​ກ່ຽວກັບການຄຸ້ມ​ຄອງ​ນຳ​ໃຊ້​ຢາຂ້າ​ຫຍ້າ​ແລະສົ່ງ​ເສີມ​ພັດທະນາ​ຫລັກສູດດ້ານ​ຊີວະ​ນາໆພັນ​ພື້ນຖານການດຳລົງ​ຊີວິດ​ຂອງ​ປະຊາຊົນ​ເຂົ້າ​ໃນ​ການ​ຮຽນ-ການສຶກສາ​ໃຫ້​ແຕ່ລະ​ທ້ອງ​ຖິ່ນ.​ໃນ​ໂອກາດ​ນີ້ບັນດາ​ທ່ານ​ທີ່​ເຂົ້າຮ່ວມ​ກອງ​ປະຊຸມຍັງ​ມີ​ການ​ສົນທະນາ​ແລະປະກອບ​ຄຳ​ຄິດ​ເຫັນ​ໃສ່​ບົດ​ລາຍ​ງານ​ໃນ​ການຈັດຕັ້ງປະຕິບັດ​ໄລຍະ​ຜ່ານ​ມາ​ເປັນຕົ້ນ​ແມ່ນ​ການວາງ​ແຜນ,ຈັດ​ສັນ​ແລະຄຸ້ມ​ຄອງ​ນຳ​ໃຊ້​ທີ່​ດິນ​ກະ​ສິກຳ​ແລະປ່າ​ໄມ້​ແບບ​ມີ​ສ່ວນ​ຮ່ວມທີ່​ໄດ້​ປັບປຸງ​ພັດທະນາ​​ໃຫ້​ດີ​ຂື້ນ.​ໃນ​ຕອນ​ທ້າຍ​ກອງ​ປະຊຸມທ່ານ ປອພວງ​ປະຣິສັກປຣະວົງວຽງຄຳກໍ່​ໄດ້​ສະ​ແດງ​ຄວາມ​ຊົມ​ເຊີຍ​ເປັນ​ຢ່າງ​ຍິ່ງ​ຕໍ່​ກັບ​ໂຄງການ​ທີ່​ໄດ້​ນຳ​ເອົາ​ບົດຮຽນ​ແລະວິທີ​ການ​ຕ່າງໆ​ເພື່ອ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ປະຊາຊົນ​ຢູ່​ເຂດ​ພູດ​ອຍ​ໃຫ້​ຫລຸດ​ພົ້ນອອກ​ຈາກ​ຄວາມທຸກ​ຍາກ​ໄປ​ເທື່ອ​ລະ​ກ້າວ.

ໂຄງການຕາບີ:ເປັນ​ໂຄ​ງການ​ຮ່ວມືທີ່​ສອງລັດຖະບານ ຂອງ ສ.ປ.ປ.ລາວ ​ແລະ ສະ​ວິດ​ເຊີ​ແລນ ​​ໄດ້​ໃຫ້​ຄໍາ​ໝັ້ນ​ສັນຍາ​ຕໍ່​ກັນ​ເພື່ອ​ສ້າງ​ໃຫ້​​ເປັນ​ໂຄງການ​​ໄລຍະ​ຍາວ ​ໂດຍ​ມອບ​ໝາຍ​ໃຫ້ ກົມ​ແຜນການ ​ແລະ ການ​ຮ່ວມ​ມມື ຂອງ ກະຊວງ​ກະສິກໍາ ​ແລະ ປ່າ​ໄມ້ ​ເປັນ​ຜູ້​ຮັບຜິດຊອບ ​ແລະ ມອບ​ເໝົາ​ໃຫ້ ບໍລິສັດ​ທີ່​ປຶກສາ NIRAS ​ເປັນ​ຜູ້​ໃຫ້​ບໍລິການ​ເພື່ອ​ຊ່ວຍ​ຈັດ​ຕັ້ງ​ປະຕິບັດ​ໂຄງການ​ຕົວ​ຈິງ

ໜ້າວຽກ:ເນັ້ນໃສ່ຍົກລະດັບຄວາມ​ຮູ້​ອັນ​ເປັນພູມປັນຍາທ້ອງຖິ່ນ, ຄວາມສະເໝີພາບດ້ານ​ບົດບາດຍິງ-ຊາຍແລະຊົນເຜົ່າໃນເຂດພູດອຍ.ການເຊື່ອມ​ໂຍງລະຫວ່າງ ການວາງແຜນນໍາໃຊ້ທີ່ດິນກະສິກໍາປ່າໄມ້​ເພື່ອ​ເຮັດ​ການຜະລິດ​ທີ່​ຕິດ​ພັນ​ກັບ​ການຕະຫຼາດ.

 

    

 

    

 

    

 

    

 

ກອງປະຊຸມໂຕະມົນປະຈຳປີ2016ໄຂຂຶ້ນທີ່ເມືອງວຽງຄຳ

 

ກອງປະຊຸມໂຕະມົນປະຈຳປີ2016ໄຂຂຶ້ນທີ່ເມືອງວຽງຄຳ

ກອງປະຊຸມປຶກສາຫາລືກ່ຽວກັບບຸລິມະສິດການພັດທະນາຂອງ ສປປ ລາວ ຖືກຈັດຂຶ້ນທີ່ແຂວງວຽງຈັນແຕ່ວັນທີ24-25 ພະຈິກ.

 

ນະຄອນຫຼວງວຽງຈັນ, 25 ພະຈິກ 2016ການເຊື່ອມສານເປົ້າໝາຍການພັດທະນາແບບຍືນຍົງ; ການເປັນຄູ່ຮ່ວມມື ເພື່ອການພັດທະນາທີ່ມີປະສິດທິຜົນ; ການຄໍ້າປະກັນສະບຽງອາຫານ ແລະ ໂພຊະນາການ; ແລະ ການເຕີບໂຕສີຂຽວ, ການກະກຽມການຮັບມືກັບໄພພິບັດ ແລະ ການປ່ຽນແປງດິນຟ້າອາກາດ ແມ່ນບັນດາຫົວຂໍ້ສຳຄັນໃນກອງປະຊຸມໂຕະມົນປະຈຳປີ 2016 ທີ່ໄດ້ສົນທະນາກັນ.

ກອງປະຊຸມໂຕະມົນປະຈໍາປີ 2016 ເປັນເວທີປຶກສາຫາລືວ່າ ບັນດາຄູ່ຮ່ວມພັດທະນາຈະມີການຮ່ວມມືກັນແນວໃດ ເພື່ອຈັດຕັ້ງປະຕິບັດບຸລິມະສິດການພັດທະນາແຫ່ງຊາດ. ກອງປະຊຸມຈະໄດ້ລາຍງານຄວາມຄືບໜ້າການຈັດຕັ້ງປະຕິບັດຂະບວນການໂຕະມົນ ໃນປີ 2016 ແລະ ໃຫ້ຄໍາແນະນໍາກ່ຽວກັບຄວາມພະຍາຍາມຮ່ວມກັນໃນການຈັດຕັ້ງປະຕິບັດໃນປີ 2017. ໝາກຜົນຕົ້ນຕໍຂອງກອງປະຊຸມໂຕະມົນປະຈໍາປີນີ້ ແມ່ນລັດຖະບານຈະຮັບຮອງແຜນການຈັດຕັ້ງປະຕິບັດຖະແຫຼງການວຽງຈັນວ່າດ້ວຍການເປັນຄູ່ຮ່ວມເພື່ອການພັດທະນາທີມີປະສິດທິຜົນ ໃນໄລຍະປີ 2016-2025 ຮ່ວມກັບບັນດາຄູ່ຮ່ວມພັດທະນາອື່ນໆ. ແຜນການນີ້ໄດ້ລະບຸມາດຕະການສໍາຄັນເພື່ອຮັດແໜ້ນການຮ່ວມມືເພື່ອການພັດທະນາຢ່າງມີປະສິດທິຜົນ ແລະ ຈະຊ່ວຍການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ແລະແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ  VIII.

ກອງປະຊຸມຈະດຳເນີນເປັນເວລາ 2 ມື້ ເຊິ່ງມື້ທຳອິດຈະມີການສົນທະນາ ແລະ ຢ້ຽມຢາມໂຄງການພາກສະໜາມສຳລັບ 4 ຂົງເຂດຂະແໜງການທີ່ເປັນບຸລິມະສິດ. ມື້ທີສອງຈະມີການປຶກສາຫາລືກ່ຽວກັບການຈັດຕັ້ງປະຕິບັດນະໂຍບາຍການພັດທະ ນາ. ກອງປະຊຸມໂຕະມົນປະຈຳປີ 2016 ຖືກຈັດຂຶ້ນພາຍໃຕ້ການເປັນປະທານຂອງພະນະທ່ານ ປອ. ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ, ພະນະທ່ານ ວິດົງ ໄຊຍະສອນ, ເຈົ້າແຂວງໆວຽງຈັນ ແລະ ທ່ານນາງ ຄາຣິນາ ອິມໂມເນັນ, ຜູ່ປະສານງານອົງການສະຫະປະຊາຊາດ ແລະ ຜູ່ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ.

ກອງປະຊຸມໂຕະມົນໃນປີນີ້ ຈັດຂຶ້ນທີ່ແຂວງວຽງຈັນ ເພື່ອຈະໄດ້ສຸມໃສ່ການຈັດຕັ້ງປະຕິບັດນະໂຍບາຍແຫ່ງຊາດ ໃນຂັ້ນທ້ອງຖິ່ນ. ເຈົ້າໜ້າທີ່ຂັ້ນສູງຈາກລັດຖະບານ ແລະ ບັນດາຄູ່ຮ່ວມພັດທະນາ ໄດ້ຮັບການຟັງການໂອ້ລົມຂອງພະນະທ່ານ ສົມດີ ດວງດີ, ຮອງນາຍົກລັດຖະມົນຕີແຫ່ງ ສປປ ລາວ, ພະນະທ່ານ ວິດົງ ໄຊຍະສອນ, ເຈົ້າແຂວງໆວຽງຈັນ, ພະນະທ່ານ ປອ. ສຸພັນ ແກ້ວມີໄຊ, ລັດຖະມົນຕີກະຊວງແຜນການ ແລະ ການລົງທຶນ, ແລະ ທ່ານນາງ ຄາຣິນາ ອິມໂມເນັນ, ຜູ້ປະສານງານອົງການສະຫະປະຊາຊາດ ແລະ ຜູ່ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ. 

 

ຮູບພາບ:

 

    

 

    

 

    

 

    

 

 

 

 

World food day at Sayaboury13102016

 

 

ສະເຫລີມສະຫລອງວັນອາຫານໂລກ ແລະ ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ 2016

 

 

 

ໃນວັນທີ 15 ຕຸລາ 2016 ທີ່ແຂວງ ໄຊຍະບູລີ, ໄດ້ມີພິທີສະເຫລີມສະຫລອງວັນອາຫານໂລກ ແລະ ວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກ 2016. ເຊິ່ງເປັນກຽດເຂົ້າຮ່ວມເປັນປະທານໂດຍ ທ່ານ ປອ ສອນໄຊ ສີພັນດອນ, ກຳມະການ ກົມການເມືອງສູນກາງພັກ, ຮອງນາຍົກ ລັດຖະມົນຕີ. ທ່ານ ປອ ລຽນ ທິແກ້ວ ກຳມະການສູນກາງພັກ, ລັດຖະມົນຕີກະຊວງກະສິກຳ ແລະ ປ່າໄມ້. ທ່ານ ນາງ ຄາຣີນາ ອິມໂມເມັນ, ຫົວໜ້າ ຜູ້ປະສານງານ ອົງການສະຫະປະຊາຊາດ ແລະ ທັງເປັນຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປ ລາວ. ທ່ານ ປອ ສະຕີເຟັນ ຣຸດກາດ, ຜູ້ຕາງໜ້າອົງການອາຫານ ແລະ ການກະເສດ ແຫ່ງອົງການສະຫະປະຊາຊາດ ປະຈຳສປປລາວ. ພ້ອມດ້ວຍຄະນະ ແລະ ແຂກພາຍໃນແຂວງທີ່ເຊີນເຂົ້າຮ່ວມໃນງານດັ່ງກ່າວ.

ການສະເຫລີມສະຫລອງ ວັນອາຫານໂລກຄົບຮອບ 36 ປີ, ວັນສາກົນ ເພື່ອລຶບລ້າງຄວາມທຸກຍາກຄົບຮອບ 23ປີ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ຄົບຮອບ 13ປີ ແມ່ນຢູ່ໃນເງື່ອນໄຂທີ່ສະຫະປະຊາຊາດໄດ້ຮັບຮອງເອົາເປົ້າໝາຍການພັດທະນາແບບຍືນຍົງ ທີ່ຖືເອົາການລຶບລ້າງຄວາມທຸກຍາກ ແລະ ໄພອຶດຫິວເປັນບຸລິມະສິດອັນດັບທຳອິດ. ງານດັ່ງກ່າວຍັງໄດ້ຈັດຂຶ້ນໃນບັນຍາກາດທີ່ທົ່ວປວງຊົນລາວທັງຊາດພວມອອກແຮງແຂ່ງຂັນກັນຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5ປີຄັ້ງທີ 8ຢ່າງເປັນຂະບວນຟົດຟື້ນ.

ພາຍໃນງານດັ່ງກ່າວລວມມີຫ້າງຮ້ານພາຍໃນແຂວງ ແລະ ແຂວງອື່ນໆ ແລະ ຮ້ານທຸລະກິດຈຳນວນໜຶ່ງເຂົ້າຮ່ວມຫລາຍກວ່າ 50 ຮ້ານ. ໂຄງການພັດທະນາລະບົບນິເວດຊີວະນາໆພັນກະສິກຳຢູ່ເຂດພູດອຍກໍໄດ້ເຂົ້າຮ່ວມວາງສະແດງຮູບພາບກິດຈະກຳ, ໂປຣເຕີ້, ປຶື້ມຄູ່ມືຕ່າງໆ, ສິນຄ້າ ແລະ ຜະລິດຕະພັນເພື່ອຈຳໜ່າຍ ຮ່ວມກັບກົມແຜນການ ແລະ ການຮ່ວມ ຂອງກະຊວງກະສິກຳ ແລະ ປ່າໄມ້. ສິນຄ້າຂອງໂຄງການມີ  ນ້ຳເຜິ້ງທຳມະຊາດແຂວງຊຽງຂວາງ, ເຂົ້າໄກ່ນ້ອຍ ແຕ່ລະປະເພດ, ໜໍ່ໄມ້ປິດ, ໄຄແຜ່ນ, ຝອຍ, ກາເຟເປັນຕົ້ນ. ແຂກ ແລະ ປະຊາຊົນໃຫ້ຄວາມສົນໃຈຫລາຍກ່ຽວກັບໂຄງການຕາບີສົ່ງເສີມການລ້ຽງເຜິ້ງໂກນ ແລະ ເຂົ້າໄກ່ນ້ອຍຂອງແຂວງຫົວພັນ. ເຊິ່ງເຮັດໃຫ້ປະຊາຊົນທົ່ວໄປສົນໃຈ ແລະ ໄດ້ຮັບຮູ້ວຽກງານຂອງໂຄງການຕາບີເພີ່ມຂຶ້ນ.

ດັ່ງນັ້ນ, ການສະເຫລີມສະໜອງວັນອາຫານໂລກ, ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກແມ່ນມີຄວາມໝາຍຄວາມສຳຄັນທີ່ສຸດແນ່ໃສ່ປູກສຳນຶກ ແລະ ສ້າງຄວາມຮັບຮູ້ ໃຫ້ປະຊາຊາດໃນທົ່ວໂລກໄດ້ເຂົ້າໃຈວ່າຄວາມທຸກຍາກ ແລະ ໄພອຶດຫິວ, ຊຶ່ງການສະເຫລີມສະຫລອງ 2 ວັນສຳຄັນດັ່ງກ່າວໃນປີນີ້ຈັດຕັ້ງຂຶ້ນພາຍໃຕ້ຄຳຂວັນການຜະລິດສະບຽງອາຫານ ແລະ ກະສິກຳ ຕ້ອງປັບຕົວໄປຕາມການປ່ຽນແປງດິນຟ້າອາກາດ ແລະ ລຶບລ້າງຄວາມທຸກຍາກທຸກຮູບແບບໃນທົ່ວໂລກໂດຍສົ່ງເສີມການມີສ່ວນຮ່ວມຂອງໝົດທຸກຄົນ.

ເພື່ອປະຕິບັດວິໄສທັດ, ຍຸດທະສາດ ແລະ ແຜນ 5 ປີກ່ຽວກັບກະສິກຳ ແລະ ປ່າໄມ້ ແລະ ພັດທະນາຊົນນະບົດ, ລຶບລ້າງຄວາມທຸກຍາກ ຮຽກຮ້ອງໃຫ້ບັນດາຂະແໜງການຂັ້ນສູນກາງ, ອົງການປົກຄອງທ້ອງຖິ່ນແຕ່ລະຂັ້ນ, ອົງການຈັດຕັ້ງມະຫາຊົນ, ປະຊາຊົນບັນດາເຜົ່າ, ພາກເອກະຊົນ, ອົງການຈັດຕັ້ງສັງຄົມ, ອົງການຈັດຕັ້ງສາກົນ ແລະ ຄູ່ຮ່ວມພັດທະນາຈົ່ງສືບຕໍ່ຮ່ວມກັບບັນດາປະຊາຊາດໃນໂລກ ພ້ອມກັນສົ່ງແຮງໃຈ ແລະ ສະໜັບສະໜູນໄປເຖິງຜູ້ທຸກຍາກ ແລະ ອຶດຫິວ ຄົ້ນຄວ້າຊອກຫາວິທີ ແລະ ມາດຕະການ ທີ່ມີປະສິດຕິຜົນ ໃນການປັບຕົວເຂົ້າກັບການປ່ຽນແປງຂອງດິນຟ້າອາກາດ. ແມ່ນສຸມໃສ່ບັນດາຈຸດສຸມບູລິມະສິດຂອງການພັດທະນາແຕ່ນີ້ຫາປີ 2020 ທີ່ລັດຖະບານໄດ້ຮັບຮອງເອົາແລ້ວນັ້ນ ໃຫ້ມີການປ່ຽນໃໝ່ຢ່າງຈະແຈ້ງຕາມທິດ 3ສ້າງ ແລະ ເຮັດໃຫ້ປະເທດຫລຸດພົ້ນອອກຈາກປະເທດດ້ອຍພັດທະນາໃນປີ 2020.

 

             

 

 

ຊົນລະປະທານກົງພັດນ້ຳແມ່ນພູມປັນຍາຂອງຊາວບ້ານ

ຊົນລະປະທານກົງພັດນ້ຳແມ່ນພູມປັນຍາຂອງຊາວບ້ານ

 

 

ແຂວງຫົວພັນແມ່ນ 1 ໃນ 8 ແຂວງພາກເໜືອຂອງປະເທດລາວ ທີ່ມີຫ້ວຍເລິກພູສູງຊັນການທຳມາຫາກິນຂອງປະຊາຊົນບັນດາເຜົ່າພົບຄວາມຫຍຸ້ງຍາກຫລາຍໂດຍສະເພາະແມ່ນການເຮັດນາປູກເຂົ້າມີບາງຂົງເຂດຫ້ວຍນ້ຳທີ່ຢູ່ຕ່ຳກວ່າເນື້ອທີ່ນາ, ເຊິ່ງບໍ່ສາມາດຈະເຮັດຝາຍເພື່ອເອົານ້ຳຂຶ້ນມາຫົດເນື້ອທີ່ນາໄດ້, ສະນັ້ນປະຊາຊົນຈຶ່ງຊອກຫາທຸກວິທີທາງເພື່ອຫານ້ຳຂຶ້ນຫົດເນື້ອທີ່ນາຂອງປະຊາຊົນໃຫ້ໄດ້ທຳການຜະລິດຕາມລະດູການດ້ວຍການສ້າງຊົນລະປະທານກົງພັດນ້ຳ ຫລືເອີ້ນວ່າ “ຫລົກ” ເພື່ອປັ່ນເອົານ້ຳຂຶ້ນຫົດເນື້ອທີ່ນາໂດຍໄດ້ພັດທະນາຈາກກົງພັດນ້ຳຕ່ຳເຂົ້າ ມາເປັນກົງພັດນ້ຳຊົນລະປະທານຈົນໄດ້ຮັບຜົນສຳເລັດໂດຍສະເພາະເຂດປະຊາຊົນກຸ່ມບ້ານຫີ້ມ ແລະ ບ້ານເມືອງແວ່ນ ເມືອງຊຳເໜືອ ແຂວງຫົວພັນ ທີ່ມີເນື້ອທີ່ນາລຽບຕາມສອງ ແຄມນ້ຳຊຳ

ປະຈຸບັນກຸ່ມບ້ານຫີ້ມມີຈຳນວນກົງພັດນ້ຳ 18 ອັນ, ບ້ານພຽນຈຳນວນ 10 ອັນ, ບ້ານ ນາຕ້າງ ຈຳນວນ 4 ອັນ, ບ້ານໂຄ້ງ ຈຳນວນ 9 ອັນ. ລວມຄອບຄົວນຳໃຊ້ທັງໝົດ 98 ຄອບຄົວ; ເນື້ອທີ່ທັງໝົດ 68 ເຮັກຕາ. ສາມາດສະໜອງປະລິມານນ້ຳລວມ 188 ລິດຕໍ່ວິນາທີ

ພໍຮອດເດືອນສາມສາກົນຂອງທຸກໆປີ. ບັນດາຄອບຄົວທີ່ເຮັດນານຳຫລົກ ຫລື ການເຮັດນາທີ່ນຳໃຊ້ຊົນລະປະທານກົງພັດນ້ຳກໍໄດ້ຫ້າງຫາກະກຽມວັດສະດຸອຸປະກອນເພື່ອສ້າງຝາຍ ແລະ ກົງພັດນ້ຳໂດຍການເຂົ້າປ່າເພື່ອຕັດເອົາໄມ້ຈຳນວນທີ່ຕ້ອງການໄດ້ຄົບຖ້ວນທີ່ພຽງພໍແລ້ວ ກໍຂົນໄປວາງໄວ້ແຄມນ້ຳບ່ອນທີ່ຈະສ້າງລະບົບຝາຍ ແລະ ກົງພັດນ້ຳ ຫລັງຈາກນັ້ນກໍເອົາເຄື່ອງມືຕ່າງໆເຊັ່ນ: ພ້າ, ຂວັນ, ຄ້ອນຕີ, ຊິວ ແລະ ເຄື່ອງມືອື່ນໆ ເພື່ອມາເຈາະປ່ອງໄມ້ຕາມຄວາມຕ້ອງການພ້ອມທັງປັບປຸງຄອກ, ເສົາ ຮ່າງລິນ ແລະຕົວກົງພັດຈົນກວ່າຈະກະກຽມສຳເລັດຕ້ອງໃຊ້ເວລາປະມານ 1 ເດືອນ.

ພາຍຫລັງທີ່ສຳເລັດການກໍສ້າງຝາຍ ຫລື ຫລົກ ເປັນທີຮຽບຮ້ອຍແລ້ວຈຶ່ງພ້ອມກັນສ້າງໂຕກົງພັດນ້ຳ ຫລື ຫລົກ, ເສົາກົງພັດຕ້ອງໃຊ້ໄມ້ເນື້ອແຂງ ສ່ວນແກ່ນກົງພັດແມ່ນໃຊ້ໄມ້ສົມ ຊະນິດດຽວເທົ່ານັ້ນຍ້ອນວ່າເວລາຕອກໄມ້ຊະນິດນີ້ຈະແໜ້ນກວ່າໄມ້ຊະນິດອື່ນໆ.  ກົງພັດນ້ຳໜຶ່ງຈະປະກອບມີ ເສົາ, ແກ່ນ, ກອນ, ຮາວ, ແຜ່ນແຕະ, ບັ້ງ, ເຊືອກຫັດ ແລະ ອື່ນໆ.

ພໍຮອດຕົ້ນເດືອນ ຫົກ ລາວ ກົງພັດນ້ຳແຕ່ລະແຫ່ງແມ່ນຕ້ອງໄດ້ສຳເລັດ ແລະ ສາມາດຜັນນ້ຳຂຶ້ນຫົດເນື້ອທີ່ນາໄດ້ຢ່າງປົກກະຕິ ແລ້ວລົງມື ໄຖ່ ຄາດ. ເຊິ່ງກົງພັດນ້ຳໜຶ່ງສາມາດສະໜອງນ້ຳເຂົ້າຫົດເນື້ອທີ່ນາໄດ້ 1 ເຮັກຕາຂຶ້ນໄປ. ສຳຄັນແມ່ນເຕັກນິກການສ້າງກົງພັດນ້ຳ ແລະ ສະຖານທີໃນຕັ້ງກົງພັດນ້ຳ

ຄຸນປະໂຫຍດຂອງກົງພັດນ້ຳ: ສະ​ໜອງ​ນ້ຳ​ໃຫ້​ແກ່​ການ​ຜະ​ລິດ ກະ​ສິ​ກຳ: ປູກ​ເຂົ້າ, ປູກ​ພືດ​ພັກ, ລ້ຽງ​ປາ, ສັດ​ໃນ​ນາ ກົບ,ຂຽດ, ປູ ແລະ ອື່ນໆ; ນຳໃຊ້​ນ້ຳ ເຂົ້າ​ໃນ​ການອຸ​ປະ​ໂພກ ແລະ ໃຊ້​ສອຍອື່ນ​ໆ; ຝາຍ(ອາດຫຼົກ, ຄອກຫຼົກ ) ເປັນ​ການ​ຕ້ານ​ກະ​ແສ​ນ້ຳ ສາ​ມາດຫຼຸດ​ຜ່ອນ​ແຮງ​ໄຫຼ​ຂອງ​ນ້ຳ ແລະ ຕ້ານ​ການ​ກັດ​ເຊາະ ຕາ​ຝັ່ງ​ເຈື່ອນ ແລະ ທັງ​ເປັນ​ການ​ສະ​ລໍ​ນ້ຳ​ຍົກ​ລະ​ດັບ​ນ້ຳ​ຊັ້ນ​ຊຶມ​ຂອງ​ດິນ​ສູງ​ກ່​ວາ​ປົກ​ກະ​ຕິ​ເຮັດ​ໃຫ້​ນ້ຳ​ລໍ​ລ້ຽງຕົ້ນ​ໄມ້​; ເປັນ​ບ່ອນ ພັກກັ້ນ​ຕອງວັດ​ສະ​ພືດ, ຫຼີ້​ຊ່ອນ, ທີ່​ເພາະ​ພັນ, ທີ່​ອາ​ໃສ ຂອງ, ​ປູ,ປາ, ກຸ້ງ​ຫອຍຫຼາຍ​ສະ​ນິດ, ທັງ​ເປັນ​ບ່ອນ ຫາ​ປາຂອງ​ປະ​ຊາ​ຊົນ; ກົງພັດນ້ຳນອກຈາກຕັກນ້ຳ ຫຼື ປັ່ນນ້ຳ ຂຶ້ນສູ່ນາແລ້ວ ບາງຄັ້ງຄາວຍັງມີໂອກາດທີ່ ບັ້ງນ້ຳ ໃນທ່າມກາງທີ່ກຳລັງຕັກນ້ຳໄດ້ມີ ປາ,ກຸ້ງ,ທຳມະຊາດຂຶ້ນສູ່ເນື້ອທີ່ນາ.

 

ຊົນລະປະທານກົງພັັັດນ້ຳຈະມີລັກສະນະປະຖົມປະຖານແບບພື້ນເມືອງ ແຕ່ກໍສາມາດສະໜອງນ້ຳຂຶ້ນຫົດເນື້ອທີ່ນາໄດ້ຢ່າງພຽນພໍ. ແຕ່ກົງກັນຂ້າມແຕ່ຖ້າປີໃດແຫ້ງແລ້ງລະດັບນ້ຳໜ້ອຍເຮັດໃຫ້ກົງພັດນ້ຳບໍ່ໝູນປິ່ນໄດ້ການສະໜອງນ້ຳກໍພົບຄວາມຫຍຸ້ງຍາກ ແລະ ປີໃດທີ່ມີຝົນຕົກຫລາຍນ້ຳນອງກໍຈະພາໃຫ້ຊົນລະປະທານເປ່ເພໂດຍສະເພາະແມ່ນລະບົບຝາຍເປັນຕົ້ນ

ຊົນລະປະທານກົງພັດນ້ຳແມ່ນພູມປັນຍາຂອງລຸ້ນປູ່, ພໍ່ເຖົ້າ ແຕ່ກ່ອນໄດ້ປະດິດສ້າງຂຶ້ນເພື່ອຮັບໃຊ້ເຂົ້າໃນຊີວິດຕົວຈິງທີ່ໄດ້ສືບທອດກັນມາເຖິງປະຈຸບັນໂດຍສະເພາະປະຊາຊົນກຸ່ມເຂດບ້ານຫີ້ມ, ກຸ່ມບ້ານເມືອງ ແວ່ນ ເມືອງຊຳເໜືອ ແຂວງຫົວພັນທີ່ໄດ້ຮັບຜົນປະໂຫຍດໃນການສະໜອງນ້ຳຂຶ້ນຫົດເນື້ອທີ່ນາທຳການຜະລິດຕາມລະດູການຈົນໄດ້ກາຍເປັນມູນມັ່ງທີ່ເປັນເອກະລັກສະເພາະຂອງທ້ອງຖິ່ນ. ພ້ອມກັນນັ້ນຍັງໄດ້ຮັບທຶນຈາກໂຄງການພັດທະນາລະບົບນິເວດຊີວະນາໆພັນກະສິກຳຢູ່ເຂດພູດອຍ (ຕາບີ) ຊ່ວຍເຫລືອດ້ານທຶນຮອນ ແລະ ທາງດ້ານເຕັກນິກວິຊາການໃຫ້ແກ່ປະຊາຊົນໃນເຂດບ້ານດັ່ງກ່າວ. ເພື່ອຫັນໃສ່ວຽກງານຂອງຕົນໃຫ້ໄດ້ຮັບການພັດທະນາ ແລະ ຄວາມສະດວກຍິ່ງຂຶ້ນ.

 

 

 

 

 

 

 

 

 

ວິດິໂອ

 

https://www.youtube.com/watch?v=P_cDBFjGWbQ

 

ຮູບພາບ: ທ່ານ Christopher Flint ແລະ ທ່ານ ວັນໄຊ ບຸນທະວົງຄຳ

 

 

ບົດຂ່າວ: ທ່ານ ວິໄລລັກ ຂຸນວິສິດ

 

 

ການກ້າເບ້ຍໄມ້ຢູ່ພະແນກກະສິກຳ ແລະ ປ່າໄມ້ແຂວງຊຽງຂວາງ

 

ການກ້າເບ້ຍໄມ້ຢູ່ພະແນກກະສິກຳ ແລະ ປ່າໄມ້ແຂວງຊຽງຂວາງ

 

 

 

ຂະແໜງປ່າໄມ້ຂອງພະແນກກະສິກຳ ແລະ ປ່າໄມ້ແຂວງຊຽງຂວາງໄດ້ສ້າງສວນກ້າມາໄດ້ຫຼາຍປີແລ້ວ, ແຕ່ລະປີ ກໍ່ໄດ້ຜະລິດເບ້ຍໄມ້ອອກຈຳນວນ ຫຼາຍພັນເບ້ຍເພື່ອສະຫນອງໃຫ້ບໍລິສັດ,ຫ້ອງການຕ່າງໆ ແລະ ປະຊາຊົນຊົນປູກເຊິ່ງປະກອບມີເບ້ຍໄມ້ອຸດສະຫະກຳ,ເບ້ຍໄມ້ປະດັບ, ເບ້ຍໄມ້ກິນໜາກ ແລະ ເບ້ຍໄມ້ອື່ນໆ ແຕ່ກໍ່ຍັງບໍ່ພຽງພໍກັບຄວາມຮຽກຮ້ອງຕ້ອງການຂອງປະຊາຊົນເນື່ອງຈາກ ງົບປະມານບໍ່ພຽງພໍ

     ດັ່ງນັ້ນມາຮອດປີ ຕົ້ນປີ 2015 ທ່າງໂຄງການ​ພັດທະນາ​ລະບົບ​ນິ​ເວດຊີວະ​ນາໆ​ພັນ​ກະສິກໍາຢູ່​ເຂດ​ພູດ​ອຍ (ຕາບີ) ໃຫ້ໃຫ້ທືນ ຂະແໜງປ່າໄມ້ຂອງພະແນກກະສິກຳ ແລະ ປ່າໄມ້ແຂວງຊຽງຂວາງ ຈຳນວນ 39,520,000 ກີບ ສຳລັບຊື້ ແນວພັນໄມ້ຕ່າງໆແລະອຸປະກອນກ້າເບ້ຍໄມ້ຕ່າງລວມເຖິງຄ່າແຮງງານບົວລະບັດຮັກສາເຊິ່ງສາມາດຜະລິດເບ້ຍໄມ້ໄດ້ 58,861 ເບ້ຍ ແຕ່ມາຮອດທ້າຍປີ 2015 ຫາຕົ້ນປີ 2016 ຢູ່ຊຽງຂວາງມີອາກາດໜາວຈັດຮິມະຕົກ ເຮັດໃຫ້ເບ້ຍໄມ້ບາງສະນິດທີ່ບໍ່ທົນຕໍ່ຄວາມໜາວໄດ້ຕາຍເປັນຈຳນວນຫຼວງຫຼາຍເຊັ້່ນ:ເບ້ຍກາເຟ ຕາຍ 21,000 ກວ່າເບຍ,

    ເພື່ອເປັນການສຶບຕໍ່ກິດຈະກຳການກ້າເບ້ຍໄມ້ໃຫ້ໄດ້ຕາມຄວາມຮຽກຫ້ອງຕ້ອງການຂອງປະຊາຊົນມາຮອດ ທ້າຍປີ 2015 ໂຄງການ ໂຄງການ​ພັດທະນາ​ລະບົບ​ນິ​ເວດຊີວະ​ນາໆ​ພັນ​ກະສິກໍາຢູ່​ເຂດ​ພູດ​ອຍ (ຕາບີ) ໄດ້ໃຫ້ທືນສະນັບສະສູນສວນກ້າຂອງຂະແໜງປ່າໄມ້ຂອງພະແນກກະສິກຳ ແລະ ປ່າໄມ້ແຂວງຊຽງຂວາງຕືມອີກເປັນມູນຄ່າ 43,021,000 ກີບ ເພືອຈັດຊື້ອຸປະກອນເຮືອນຮົມສວນກ້າ,ແນວພັນໄມ້ຕ່າງໆແລະອຸປະກອນກ້າເບ້ຍໄມ້ຕ່າງລວມເຖິງຄ່າແຮງງານບົວລະບັດຮັກສາເຊິ່ງສາມາດຜະລິດເບ້ຍໄມ້ໄດ້ແລ້ວຈຳນວນ 12,496ເບ້ຍ ແລະ ຈະຍັງສຶບຕໍ່ກ້າອີກ ຮອດເດືອນ 6 ປີ 2016 ນີ້ໃຫ້ໄດ້ 53,475 ເບ້ຍ ເພືອ່ສະໜອງໃຫ້ປະຊາຊົນປູກໃນສົກປີ 2016 ແລະ 2017

 

 

  

 

 

  

 

  

 

 

ບົດຂ່າວ ແລະ ຮູບພາບຈາກ:

ທ່ານ ແສງພັນ ໄຊພົມມີ ຜູ້ອຳນວຍຄວາມສະດວກປະຈຳແຂວງ ຊຽງຂວາງ

ຝຶກອົບຮົມຜະລິດຟອຍ (ຍູ້ກວດ) ໃຫ້ມີຄຸນະພາບ ແລະ ເພີ່ມລາຄາໃຫ້ແກ່ຊາວບ້ານ

ຝຶກອົບຮົມຜະລິດຟອຍ (ຍູ້ກວດ) ໃຫ້ມີຄຸນະພາບ ແລະ ເພີ່ມລາຄາໃຫ້ແກ່ຊາວບ້ານ

 

 

 

ພະແນກກະສິກໍາ ແລະ ປ່າໄມ້ແຂວງຫຼວງພະບາງ, ຫ້ອງການກະສິກໍາ ແລະປ່າໄມ້ເມືອງໂພນໄຊ, ຫ້ອງການຊັບພະຍາ ກອນທໍາມະຊາດ ແລະສິ່ງແວດລ້ອມເມືອງຊຽງເງິນ ແລະໂຄງການພັດທະນາລະບົບນິເວດຊີວະນາໆພັນກະສິກໍາເຂດພູດອຍ (The Agro-Biodiversity Initiative – TABI)ໄດ້ຮ່ວມກັນສະໜັບສະໜູນຈັດຝຶກອົບຮົມ ເພື່ອເພີ່ມທັກສະຄວາມສາມາດຂອງຜູ້ຜະລິດຟອຍຍູ້ກວາດໃຫ້ມີຄຸນນະພາບ ຢູ່ເມືອງໂພນໄຊ ແລະເມືອງຊຽງເງິນ. ກິດຈະກໍາດັ່ງກ່າວໄດ້ຈັດຂື້ນໃນຊ່ວງເດືອນມີນາ (03) ແລະເດືອນເມສາ (04) 2816 ໂດຍມີນັກສໍາມະນາກອນຈໍານວນ 24 ທ່ານ, ຍິງ 15 ທ່ານ (63%) ຈາກ 5 ບ້ານໃນກຸ່ມບ້ານພັດທະນາສົບເຈ້ຽ ເມືອງໂພນໄຊ ແລະຈໍານວນ 26 ທ່ານ, ຍິງ 16 ທ່ານ (62%) ຈາກ 5 ບ້ານ ຂອງກຸ່ມບ້ານພັດທະນາກີ່ວຫຍ້າ ເມືອງຊຽງເງິນ. ການຈັດຊຸດຝຶກອົບຮົມໄດ້ຈັດແບ່ງເປັນ ສອງ (02) ຄັ້ງ ຄື ຄັ້ງທີ່ 1 ໄດ້ຈັດຂື້ນຢູ່ສວນກ້າເບ້ຽໄມ້ ບ້ານພັກຫົກ ເມືອງໂພນໄຊ ລະຫວ່າງ ວັນທີ 14- 18/03/2016 ໂດຍມີຄູຝຶກຈໍານວນ 4 ທ່ານ ມາຈາກເມືອງຕົ້ນເຜິ້ງ ແຂວງບໍ່ແກ້ວ ມາເປັນຜູ້ຖ່າຍທອດດ້ານເຕັກນິກວິຊາການໃຫ້ແກ່ນັກສໍາມະນາກອນ. ສ່ວນຊຸດອົບຮົມຄັ້ງທີ່ 2 ທີ່ຈັດຂື້ນຢູ່ກຸ່ມບ້ານກີ່ວຫຍ້າ ເມືອງຊຽງເງິນ ຈັດຂື້ນລະຫວ່າງ ວັນທີ 26-29 ເດືອນເມສາ (04) 2016 ໂດຍມີຄູຝຶກຈາກກຸ່ມບ້ານສົບເຈ້ຽຈໍານວນ 4 ທ່ານ ຜູ້ໄດ້ຮັບການຝຶກອົບຮົມຜ່ານນັ້ນມາເປັນຜູ້ຝຶກອົບຮົມຖ່າຍທອດດ້ານເຕັກນິກວິຊາການຂອງການຜະລິດຟອຍຍູ້ກວາດແບບຄຸນນະພາບໃຫ້ແກ່ນັກສໍາມະນາກອນໃນຄັ້ງນີ້. ການຈັດຝຶກອົບຮົມທັງ 02 ຊຸດນີ້ໄດ້ຮັບການຮ່ວມມືຊ່ວຍເຫຼືອແລະການປະສານງານກັບຄູຝຶກ ພ້ອມທັງການຄວບຄຸມການຝຶກອົບຮົມດັ່ງກ່າວ ຈາກ ສະມາ ຄົມພັດທະນາສິ່ງແວດລ້ອມຊຸມຊົນ (Development Environment Community Association -DECA).

 

ການນໍາຂອງເມືອງຂອງ ສອງເມືອງ ໄດ້ລົງໃກ້ຊິດຕິດແທດ ແລະໃຫ້ທິດຊີ້ນໍາຂອງຝຶກອົບຮົມ ສອງ ຄັ້ງດັ່ງກ່າວ, ໂດຍມີ ທ່ານ ສີຈັນ ລັດສະໝີ ເລຂາພັກເມືອງ ເຈົ້າເມືອງໆເມືອງໂພນໄຊ ແລະ ທ່ານ ດຣ. ສົມຫວັງ ດວງອາວອນ ຄະນະປະຈຳພັກເມືອງ, ຫົວໜ້າຫ້ອງການຈັດຕັ້ງເມືອງຊຽງເງີນ.

 

ການຝຶກອົບຮົມຜະລິດຍູ້ກວາດແມ່ນ ເລັ່ງໃສ່ເປົ້າໝາຍ ຂອງການຊຸກຍູ້ສົ່ງເສີມພູມປັນຍາທ້ອງຖິ່ນ ໂດຍການການຍົກລະດັບທັກສະຄວາມສາມາດທີ່ມີຢູ່ນໍາຜູ້ຜະລິດ ແລະສະໜັບສະໜູນການໝູນນຳໃຊ້ຊັບພະຍາກອນທ້ອງຖີ່ນ ແລະເພີ່ມມູນຄ່າຊັບພະຍາກອນເຄື່ອງປ່າຂອງດົງ ເພື່ອເຊື່ມໂຍງກັບຕະຫຼາດພາຍໃນທ້ອງຖິ່ນ ແລະບ່ອນອື່ນໆພາຍໃນປະເທດ. ຜົນໄດ້ຮັບຈາກການຝຶກອົບຮົມ 2 ຄັ້ງດັ່ງກ່າວ ແມ່ນນັກສໍາມະນາກອນ ຫຼື ຜູ້ຜະລິດ ແມ່ນສາມາດນໍາເອົາຄວາມຮູ້ ແລະວິຊາການທີ່ໄດ້ຮຽນຮູ້ມາ ໄປຖ່າຍທອດສູ່ການຜະລິດຕົວຈິງໄດ້ ຊື່ງໄດ້ມີຜະລິດຕະພັນຈໍາໜ່າຍອອກສູ່ຕະຫຼາດທີ່ນະຄອນຫຼວງວຽງຈັນ ແລະໃນທ້ອງຖິ່ນຈຳນວນຫນື່ງ. ສິ່ງສຳຄັນແມ່ນນຳໃຊ້ແຂມທີ່ເກີດໃນທຳມະຊາດ ແລະ ສວນປູກຂອງປະຊາຊົນໃນເຂດຕ່າງໆຈໍານວນໜຶ່ງ. ຢ່າງໃດກໍຕາມຜະລິດຕະພັນແຂມ ທີ່ຜ່ານມາໄດ້ຂາຍເປັນວຸດຖຸດິບໄດ້ລາຄາຖືກແລະມີບາງຈໍານວນໄດ້ນຳມາແປຮູບ ເປັນຜະລິດຕະພັນຍູ້ກວາດແບບປະຖົມປະຖານ ເພື່ອເພີ່ມມູນຄ່າ ເຊັ່ນ: ຖ້າຂາຍເປັນວັດຖຸດິບຈະໄດ້ມູນຄ່າປະມານ 6,000 ກີບ/ກິໂລ ແຕ່ຖ້າເອົາມາຜະລິດເປັນຍູ້ກວາດແລ້ວ 1 ກິໂລ ສາມາດຜະລິດຍູ້ກວາດໄດ້ 3 ກ້ານ ບວກໃສ່ວັດຖຸປະກອບທີ່ຫາໄດ້ຈາກທ້ອງຖິ່ນແລ້ວ ສາມາດຂາຍໄດ້ 10,000 ກີບ/ກ້ານ. ໃນເບື້ອງຕົ້ນນີ້ກຸ່ມຜະລິດຢູ່ເມືອງໂພນໄຊ ໄດ້ຜະລິດຍູ້ກວາດໄດ້ 384 ກ້ານ ແລະສ້າງລາຍຮັບໄດ້ 3,840,000 ກີບ.

 

 ເມື່ອເປັນດັ່ງນັ້ນກໍເຫັນວ່າຊາວບ້ານໄດ້ມີການຄູ້ມຄອງປົກປັກຮັກສາແລະນຳໃຊ້ເຄື່ອງປ່າຂອງດົງຢ່າງມີປະສິດທີຜົນ ແລະມີຄວາມສອດຄ່ອງກັບຍຸດທະສາດຊີວະນາໆພັນກະສິກຳ ອີກດ້ວຍ. ນອກຈາກ ທາງໂຄງການຕາບີ ໄດ້ສະໜັບສະໜູນງົບປະມານຝຶກອົບຮົມເຕັກນິກການຜະລິດຄຸນນະພາບຍູ້ກວາດໃຫ້ແກ່ນັກສໍາມະນາກອນຈໍານວນ 50 ທ່ານ, ຍິງ 31 ທ່ານ (62%) ໃນ 10 ບ້ານ ຂອງ 2 ເມືອງດັ່ງກ່າວມາຂ້າງຕົ້ນແລ້ວ. ທາງໂຄງການຕາບີ ຍັງໄດ້ສະໜອງກອງທຶນໝູນວຽນ ເພື່ອຜະລິດໃນ 5 ບ້ານ (ກຸ່ມບ້ານສົບເຈັ້ຍ 4 ບ້ານ ແລະ ກູ່ມບ້ານນໍ້າບໍ່ 1 ບ້ານ) ໄດ້ມີກອງທຶນ ສໍາລັບ ຊື້ວັດຖຸດິບ ແລະເຄື່ອງມືອຸປະກອນຮັບໃຊ້ການຜະລິດຟອຍຍູ້ກວາດບ້ານລະ 2,000,000 ກີບ ລວມ 5 ບ້ານ ເປັນມູນຄ່າ 10,000,000 ກີບ. ກອງທຶນດັ່ງກ່າວ ໄດ້ຈັດຝຶກອົບຮົມ ແລະມອບໝາຍໃຫ້ຄະນະຮັບຜິດຊອບໃນບ້ານເປັນຜູ້ຄຸ້ມຄອງບໍລິຫານແບບຍືນຍົງ.

 

 

 

 

 

 

 

 

 

 

 

 

 

 

 

ບົດຂ່າວ: ຈາກທ່ານ ພູນສະຫວັນ ພັນທະວົງສີ ຜູ້ປະສານງານແຂວງ ຫລວງພະບາງ

 

 

ກອງປະຊຸມຖອດຖອນບົດຮຽນກ່ຽວກັບດິນເຊື່ອມໂຊມ ແລະ ການນຳໃຊ້ສານເຄມີເຂົ້າໃນການປູກສາລີເປັນສິນຄ້າ

ກອງ​ປະຊຸມຖອດ​ຖອນ​ບົດຮຽນ​ກ່ຽວ​ກັບດິນ​ເຊື່ອມ​ໂຊມ

 ​ແລະ ການ​ນຳ​ໃຊ້​ສານ​ເຄມີເຂົ້າໃນການ​ປູກ​ສາລີ​ເປັນ​ສິນຄ້າ​

 

 

ໃນ​ຕອນ​ເຊົ້າຂອງ​ວັນ​ທີ 11 ມີນາ 2016 ພະ​ແນ​ກກະສິກຳ ​ແລະ ປ່າ​ໄມ້​ແຂວງ​ຊຽງ​ຂວາງ​​ໄດ້​ຈັດ​ກອງ​ປະຊຸມຖອດ​ຖອນ​ບົດຮຽນ​ກ່ຽວ​ກັບທີ່ດິນ​ເຊື່ອມ​ໂຊມ ​ແລະ ການ​ນຳ​ໃຊ້​ສານ​ເຄມີເຂົ້າໃນການປູກສາລີເປັນສິນຄ້າຂຶ້ນ​ ຢູ່ທີ່ຫ້ອງປະຊຸມຫ້ອງ​ວ່າການ​ເມືອງ​ຄຳ. ພາຍ​ໃຕ້​ການ​ເປັນ​ປະທານ​ຂອງ​ທ່ານ ຄຳ​ສີ ຈັນທະ​ວົງ​ສີ ກຳມະການ​ພັກ​ແຂວງ ຫົວໜ້າ​ພະ​ແນ​ກກະສິກຳ ​ແລະ ປ່າ​ໄມ້​ແຂວງ​ຊຽງ​ຂວາງ ມີ​ທ່ານ​ເຈົ້າ​ເມືອງ,ຮອງ​ເຈົ້າ​ເມືອງ, ຕາງໜ້າ​ຈາກກະຊວງ​ກະສິກຳ ​ແລະ ປ່າ​ໄມ້, ພະ​ແນ​ກການ​, ຂະ​ແໜງ​ການທີ່​ກ່ຽວຂ້ອງ​ຂອງ​ແຂວງ, ຫ້ອງການ​ກະສິກຳ ​ແລະ ປ່າ​ໄມ້​ເມືອງ ນອກ​ນີ້​ຍັງ​ມີບັນດາ ຊ່ຽວຊານ​ຈາ​ກໂຄງການ​ຕ່າງໆ​ທີ່ປິ່ນ​ອ້ອມພະ​ແນ​ກກະສິກຳ ​ແລະ ປາ​ໄມ້ ​ແລະ ຕາງໜ້າ​ຈາກຊາວບ້ານ​ເມືອງ​ລະ 5 ບ້ານ ​ເຂົ້າຮ່ວມ​ຈໍານວນ 50 ທ່ານ, ຍິງ 4 ທ່ານ . ​

 

 

ຈຸດປະສົງ​ຂອງ​ກອງ​ປະຊຸມ​ ແມ່ນເພື່ອປຶກສາຫາລືຊອກຫາວິທີທາງແກ້ໄຂບັນຫາດິນເຊື່ອມໂຊມ ແລະ ການນຳໃຊ້ສານເຄມີເຂົ້າໃນການຜະລິດສາລີເປັນສິນຄ້າ. ກອງປະຊຸມໄດ້ຮັບຟັງການລາຍງານສະພາບ​ການ​ປູກ​ສາລີຢູ່​ໃນ 3 ​ເ​ມືອງ ຈາກ​ຄະນະ​ຫ້ອງການ​ກະສິກຳ ​ແລະ ປ່າ​ໄມ້​ເມືອງ ​ແລະ ການ​ລາຍ​ງານວຽກ​ງານການປັບປຸງດິນປູກສາລີເປັນສິນຄ້າຢູ່ເມືອງຄຳ, ການຄຸ້ມຄອງ ແລະ ໂຄສະນາຜົນຮ້າຍຂອງການນຳໃຊ້ສານເຄມີ ໃນໄລຍະປີ2014 ຫາ 2015 ໂຄງ​ການ​ພັດ​ທະ​ນາ​ລະ​ບົບ​ຊີ​ວະນາໆ​ພັນ​ກະ​ສິກຳເຂດ​ພູ​ດອຍ(TABI) ໄດ້​ສະ​ໜ​ບັ​ສະ​ໜູນ​ທຶນ​ສຶກ​ສາ​ຂໍ້​ມູນ​ສະ​ພາບ​ການ​ນຳ​ໃຊ້​ສານ​ເຄ​ມີ, ສະ​ພາບ​ການ​ປູກ​ສາ​ລີ, ວຽກ​ງານ​ປັບ​ປຸງ​ດິນ​ຢູ່​ເມືອງ​ຄຳ, ພູ​ກູດ ແລະ ໜອງ​ແຮດ.ໃນ​ບົດ​ລາຍ​ງານ​ທັງ 3 ເມືອງ​ໄດ້​ສະ​ແດງຂໍ້​ມູນການນຳໃຊ້ສານເຄມີ, ຢາປາບສັດຕູພືດໃນເຂດເມືອງໜອງແຮດມີເນື້ອທີ່ກວມເອົາ 85%,ເມືອງຄຳມີເນື້ອທີ່ກວມເອົາ 60% ແລະ ເມືອງພູກູດມີເນື້ອທີ່ກວມເອົາ 35%. ພາຍຫລັງ​ໄດ້​ມີ​ໂຄງ​ການ​ຕາ​ບີ​ປະ​ຕິ​ບັດ​ກິດ​ຈະ​ກຳເຮັດ​ການ​ໂຄ​ສະ​ນາ​, ເຜີຍ​ແຜ່​ຂໍ້​ມູນ​ຂ່າວ​ສານຈາກ​ຫລາຍ​ຊ່ອງ​ທາງ​, ສ້າງ​ສ່ວນ​ສາ​ທິດ​ການ​ປັບ​ປຸງ​ດິນ, ຈັດ​ທັດ​ສະ​ນະ​ແລກ​ປ່ຽນ​ບົດ​ຮຽນ​ລະ​ຫວ່າງ​ບ້ານ​ກັບ​ບ້ານ ມາ​ຮອດ​ປີທ້າຍ​ປີ2015 ສາ​ມາດ​ສະ​ຫຼຸບ​ໄດ້​ວ່າ: ຂໍ້​ມູນ​ການ​ນຳ​ໃຊ້​ສານ​ເຄ​ມີ​ລຸດ​ລົງ 26% ແລະ ມີ 4 ບ້ານ​ຂອງ​ເມືອງ​ຄຳ​ປະ​ກາດ​ຢຸດ​ເຊົ່າ​ການ​ນຳ​ໃຊ້​ຢາ​ຂ້າ​ຫ​ຍ້າ.ຫລັງ​ຈາກນັ້ນ​ກອງ​ປະ​ຊຸມໄດ້ຈັດເປັນກຸ່ມສົນທະນາຊອກຫາບັນຫາ,ຂໍ້ຫຍຸ້ງຍາກ, ສິງທ້າທາຍ​ ແລະ ​ວີ​ທີ​ທາງ​ແກ້​ໄຂ​ໃນ​ຕໍ່ໜ້າ. ພ້ອມກັນນັ້ນຍັງໄດ້ຮັບຟັງການສະ​ເໜີ​ແນວ​ຄວາມ​ຄິດ, ການປະກອບຄຳຄິດຄຳເຫັນ​ຈາກ​ບັນດາຊ່ຽວຊານໂຄງການເອຟີກັສ, ໂຄງການລູຣັດ, ໂຄງການຕາບີ ແລະ ການນຳຂັ້ນເມືອງຈາກ 3 ເມືອງ ​ເພື່ອ​ຍົກ​ໃຫ້​ເຫັນ​ວິທີ​ທາງ​ແກ້​ໄຂ​ໃນ​ປີ​ຕໍ່​ໄປ ​ແລະ ​ແຫຼ່ງທຶນ​ທີ່​ຈະ​ນຳ​ໃຊ້​ເຂົ້າ​ໃນ​ວຽກງານດັ່ງກ່າວ.

 

​ໃນ​ຕອນ​ທ້າຍ​ຂອງ​ກອງ​ປະຊຸມ​ ຍັງ​ໄດ້ຮັບ​ຟັງ​ການໂອ້ລົມ​ປະກອບ​ຄຳ​ຄິດ​ເຫັນ​ຂອງທ່ານ ​ເພັງ​ ສຸວັນ​ທອງ ຫົວ​ຫ​ນ້າ​ແຜນ​ງານ​ໂຄງ​ການຈາກກົມແຜນການ ແລະ ການຮ່ວມມື ກະຊວງກະສິກຳ ແລະ ປ່າໄມ້ ເຊິ່ງທ່ານ​ໄດ້​ຍ້ອງຍໍ​ຊົມ​ເຊີຍ​​ເປັນ​ພິ​ເສດ​ໃຫ້​ແກ່ທຸກ​ພາກສ່ວນ​ທີ່​ກ່ຽວ​ຂ້ອງ​ໃນ​ການຈັດຕັ້ງປະຕິບັດ​ວຽກງານ ​ແລະ ຊອກ​ຫາ​ແຫຼ່ງທຶນ​ເຂົ້າມາ​ປະຕິບັດວຽກງານ​ຢູ່ພາຍໃນແຂວງຊຽງຂວາງ ​ແລະ ທ່ານ​ຍັງໄດ້ຍົກໃຫ້ເຫັນຄວາມສຳຄັນຂອງການຈັດກອງປະຊຸມໃນວຽກງານນີ້ ເພື່ອເປັນທິດ​ທາງ​ໃນ​ການ​ຈັດຕັງປະຕິບັດວຽກງານປັບປຸງ​ດິນ, ວຽກງານການຄຸ້ມຄອງ ແລະ ນຳໃຊ້ສານເຄມີ ເຂົ້າໃນການ​ປູກ​ສາລີ​ເປັນ​ສິນຄ້າ ​ໄປ​ຕາມ​ຍຸດ​ທະ​ສາດ​ຂອງ​ເມືອງ ແລະ ແຂວງ  ທັ້ງນີ້ກໍ່ເພື່ອເປັນການຊຸກຍູ້ສົ່ງເສີມປະຊາຊົນບັນດາເຜົ່າໃນການສ້າງເສດຖະກິດຄອບຄົວ ໃຫ້ຫຼຸດພົ້ນອອກຈາກຄວາມທຸກຍາກເພື່ອລະກ້າວ, ຊື່ງ​ທ່ານ​ໄດ້​ຊີ້​ນຳ​ບາງ​ຫ​ນ້າ​ວຽກ​ທີ່​ຕ້ອງ​ເອົາ​ໃຈ​ໃສ່​ໃນ​ຕໍ່​ຫ​ນ້າ​ເຊັ່ນ: (1)ຕ້ອງ​ໄດ້​ມີ​ການ​ຈັດ​ສັນ​ທີ່​ດິນ​ທຳ​ການ​ຜະ​ລິດ​ຢ່າງ​ເປັນ​ລະ​ບົບ; (2)ຕ້ອງ​ໄດ້​ຮັກ​ສາ​ເສດ​ພືດ​ຕ່າງໆ ເພື່ອ​ເປັນ​ທາດ​ອາ​ຫານ​ປັບ​ປຸງ​ດິນ; (3)ພວກ​ເຮົາ​ຍັງ​ຂາດ​ນິ​ຕິ​ກຳ​, ການ​ເຜີຍ​ແຜ່​ນິ​ຕິ​ກຳ​ທີ​ມີ​ບໍ່​ທັນ​ເຂັມ​ງວດ, ການຄຸ້ມ​ຄອງ​ນຳ​ເຂົ້າ​ສານ​ເຄ​ມີ​ທີ່​ຕ້ອງ​ຫ້າມ​ຍັງ​ບໍ່​ທັນ​ຮັດ​ຄຸມ; (4)ວິ​ທີ​ການ​ຄຸ້ມ​ຄອງ​ແຕ່​ລະ​ດ້ານ​ຍັງ​ເຮັດ​ບໍ່​ທັນ​ດີ​ເທົ່າ​ທີ່​ຄວນ.

 

 

 

 

 

 

 

 

 

 

ຂ່າວ: ທ່ານ ສົມຄວນ ມິດຕະສີ ຜູ້ປະສານງານແຂວງ ຊຽງຂວາງ

ພາບ: ທ່ານ ແສງພັນ ໄຊພົມມີ ຜູ້ອຳນວຍຄວາມສະດວກ ແຂວງ ຊຽງຂວາງ